«Бәйтерек» ұлттық басқарушы холдингінің алаңында Қазақстанның Даму Банкі, Қазақстанның экспорттық-кредиттік агенттігі және Шығыс Қазақстанның жетекші май өңдеу кәсіпорындары — «Altyn Shyghys» ЖШС мен «Qazaq-Astyq Group» ЖШС арасында үшжақты келісімдерге қол қойылды, деп хабарлады Холдингтің баспасөз қызметі.
«Бәйтерек» холдингі Басқарма төрағасының орынбасары Жандос Шайхы алғы сөзінде бұл келісімге қол қою рәсімі Холдинг стратегиясының маңызды кезеңі екенін айтты.
«Қазақстанның майлы өнімдері халықаралық аренада өзін дәлелдеді, өндіріс пен экспорт көлемі айтарлықтай өсті. «Бәйтерек» холдингі мен оның еншілес ұйымдарының міндеті – сауда қаржыландыруы, айналым қаражатын несиелеу және экспорттық операцияларды сақтандыру сияқты қаржылық қолдау құралдарының толық спектрін ұсыну. Бұл қазақстандық экспорттаушылардың жаңа деңгейге шығуына, жеткізу географиясын кеңейтуге және сыртқы нарықтардағы еліміздің позицияларын нығайтуға мүмкіндік береді», – деді Жандос Шайхы.
Келісімдер Қазақстанның май өнімдерін экспорттауға бағытталған, Қазақстанның Даму Банкі мен Экспорттық-кредиттік агенттігі жүзеге асырып отырған жаңа бірлескен бағдарламаның аясында жасалды. Аталған бағдарламаның алғашқы қатысушылары ретінде «Altyn Shyghys» пен «Qazaq-Astyq Group» кәсіпорындары таңдалды. Бағдарлама экспорт алдындағы қаржыландыру және сақтандыру құралдарын қамтиды. Бұл отандық кәсіпорындарға өндіріс көлемін ұлғайтуға және сыртқы нарықтағы қатысуын кеңейтуге мүмкіндік береді.
Бүгінде елде күнбағыс, рапс, соя, зығыр, сафлор және мақта сияқты түрлі дақылдарды өңдеуге қабілетті 55 ірі кәсіпорын жұмыс істейді. Бұл кәсіпорындар өз өнімдерін Орталық Азия, Еуропа, Таяу Шығыс пен Қытай нарықтарына экспорттай алады.
2025-жылы елімізде майлы дақылдар егістігі өткен жылмен салыстырғанда 12,4%-ға артып, 3,3 млн гектарға жетеді деп күтілуде. Бұл өсім өсімдік майы мен күнжара экспортын Орталық Азияға 6–10%-ға дейін, яғни 580–600 мың тоннаға дейін арттырып, Қазақстанды өңделген май өнімдерінің негізгі жеткізушісі ретінде өңірде бекіте түседі.
Қол қойылған келісімдерді іске асыру және жаңа бағдарламаны енгізу экспорттық түсімдердің ұлғаюына ғана емес, сонымен қатар еліміздің агроөнеркәсіп кешенінің орнықты дамуына да ықпал етіп, қосылған құны жоғары, заманауи және бәсекеге қабілетті өндірістердің қалыптасуын қамтамасыз етеді.
Сурет: Холдинг
