Абай облысында ауыл шаруашылығының жалпы өнім көлемі 9 айда 339,5 млрд теңгеге жеткен. Бұл туралы бүгін аймақ әкімі Берік Уәли Орталық коммуникациялар қызметінің алаңында атқарылған жұмыстар мен алдағы жоспарлар туралы баяндағанда айтты.
«Ауыл шаруашылығының жалпы өнім көлемі 9 айда 339,5 млрд. теңгені құрады, нақты көлем индексі – 102,8%. Оның ішінде мал шаруашылығының өнімдері 209,7 млрд. теңгеге өндіріліп, 105% өсім қалыптасты. Саланы мемлекеттік қолдау шаралары аясында 15,1 млрд. теңге субсиядия бөлінді. Атап айтқанда, өсімдік шаруашылығын дамытуға – 2,5 млрд. теңге, мал шаруашылығына – 4,8 млрд. теңге, қаржы құралдарын субсидиялауға және қайта өңдеу саласына – 7,8 млрд. теңге қарастырылды», — деді облыс әкімі.
Бұдан бөлек «Кең Дала» бағдарламасы аясында облыстың 202 шаруасына көктемгі егіс және күзгі егін жинау жұмыстарын жүргізу үшін 5%-бен 9,5 млрд теңге қаржы берілген.
13,5 млрд теңгеге жаңадан 446 бірлік заманауи ауыл шарушылығы техникасы алынып, техника паркін жаңарту деңгейі 5,1% жеткен. Бұл көктемгі егіс егу және егін жинау кезеңіндегі еңбек өнімділігінің тиімділігін арттырды. Егін жинау жұмыстары 782,1 мың гектар егіс алқабында жүргізілген.
«Президенттің егіс алқаптарын әртараптандыру жөніндегі тапсырмасын іске асыру аясында дәнді дақылдар алқабы 12 мың гектарға қысқарып, жоғары рентабельді майлы дақылдар алқабы өткен жылмен салыстырғанда 42,5 мың гектарға ұлғайды», — деп атап өтті аймақ басшысы.
Сондай-ақ мемлекеттік қолдау шараларының арқасында 9 айда 101 мың тонна ет (5,0%-ға өсті) және 248,4 мың тонна сүт (6,0%-ға өсті) өндірілген.
«Абай облысы ежелден ауыл шаруашылығына бейімделген аймақ. Мемлекет басшысы Жолдауында ауыл шаруашылығын жаңа деңгейге көтеруге қатысты нақты тапсырмалар берді. Негізгі міндет – алдағы бес жылда ауыл шаруашылығының жалпы өнімін екі есе арттырып, саладағы еңбек өнімділігін үш есе ұлғайтуымыз қажет», — деді Берік Уәли.
Сурет: облыс әкімдігі
