Азық-түлік корпорациясы 15 мың тонна көлеміндегі жоғары сапалы қазақстандық бидайының бірінші партиясын Вьетнамға жөнелтуді бастады. Контейнерлік пойыз Ақмола облысының астық қабылдау кәсіпорындарынан жөнелтіледі, деп хабарлады Корпорацияның баспасөз қызметі.
Жеткізу мультимодальды схема бойынша жүзеге асырылады: алдымен теміржол арқылы астық Достық – Алашанькоу шекара өткелі арқылы Қытайдың Ляньюнган халықаралық теңіз портына жеткізіледі, содан кейін теңіз кемелеріне тиеліп, Вьетнамның Hai Pong портына барады.
«Азық-түлік корпорациясы» ҰК басқарма төрағасы Асылхан Джувашевтың айтуынша, астықты Вьетнамға жөнелту компания үшін тарихи маңызға ие. Оңтүстік-Шығыс Азия нарығына шығу экспорттық бағыттарды әртараптандыру және қазақстандық ауыл шаруашылығы өнімдерін халықаралық нарықтарға ілгерілету стратегиясын іске асырудағы маңызды қадам.
«Соңғы бес жылда ұлттық оператор Қазақстан үшін басым нарықта өз орнын алу үшін Қытайға жыл сайын шамамен 200 мың тонна астық жеткізді. Биыл біз жеткізу географиясын кеңейту арқылы экспорт көлемін ұлғайтуды жоспарлап отырмыз. Қазірдің өзінде Марокко Корольдігіне 60 мың тонна азық-түлік бидайы жөнелтілді. Оңтүстік-Шығыс Азияға келетін болсақ, бұл нарық жоғары әлеуетке ие және қазақстандық ауыл шаруашылығы өнімдерін өндірушілер үшін өте маңызды», — деді Асылхан Джувашев.
Азық-түлік корпорациясының мәліметінше, қазақстандық астық Вьетнамға ең соңғы рет 2017-жылы жөнелтілген. Содан кейін жеткізу көлемі небәрі 720 тоннаны құрады.
Азық-түлік корпорациясы алыс шетел нарықтарындағы орнын нығайтуға бағытталған экспорттық саясатын іске асырады. Еуропалық Одақ, MENA (Таяу Шығыс және Солтүстік Африка) аймағы және Оңтүстік-Шығыс Азия елдеріне ерекше назар аударылады.
Сурет: Азық-түлік корпорациясы
