Азық-түлік корпорациясы Memolux компаниясымен Солтүстік Қазақстан облысындағы өңдеу зауытына дәнді және майлы дақылдарды жеткізу туралы келісті. Кейіннен өндірілген өнім Қытайға экспортталатын болады. Бұл туралы Корпорацияның баспасөз қызметі хабарлады.
Қазіргі уақытта зауытқа 10 мың тонна астықты жөнелту жұмыстары жүргізілуде. Болашақта ұлттық оператор жылына 500 мың тоннаға дейін дәнді дақылдарды және 100 мың тоннаға дейін майлы дақылдарды жеткізе алады.
Осы мақсатта басқарушы директор Ильдар Исмағұлов пен Басқарма төрағасының орынбасары Самат Теньбаевтың бастаған Азық-түлік корпорациясының өкілдері Солтүстік Қазақстанда «Тайынша-Май» ЖШС және «Memolux» ЖШС инвестициялық жобаларын іске асырған «Сиань Ай Цзюй» өнеркәсіптік тобының акционерлерімен келіссөздер жүргізді. Тараптар дайын өнімді, оның ішінде ұн мен өсімдік майын Қазақстанның ішкі нарығына және ҚХР-на экспортқа шығару көлемін ұлғайту мүмкіндігін талқылады.
«Қазақстандық Memolux және «Тайынша-Май» кәсіпорындары өңірдегі агроөнеркәсіптік кластердің негізін құрайды. Экспортқа бағытталған бұл ірі аграрлық жобаның инвесторы — Қытайдың «Сиань Ай Цзюй» өнеркәсіптік тобы. Корпорация дәнді дақылдарды сақтаумен, өңдеумен, рапс және күнбағыс майларын өндірумен айналысады, азық-түлікті экспортқа шығарумен айналысады. Сианьда (ҚХР) және Алашанькоуда логистикалық инфрақұрылымы бар, Қытай-Қазақстан «құрғақ портты» құруға қатысады», — делінген Азық-түлік корпорациясы таратқан ақпаратта.
Сурет: Азық-түлік корпорациясы
