2022 жылдан бері Азық-түлік келісімшарт корпорациясы 2000-ға жуық фермер мен ауыл шаруашылығы кәсіпорнына қолдау көрсетті. Ең көп саны – 832 ауыл шаруашылығы тауарын өндіруші 2024 жылы астық нарығында мемлекеттік оператор желісі бойынша көмек алған. Бұл туралы Ауыл шаруашылығы министрлігінің баспасөз қызметі хабарлады.
Фермерлерді қолдаудың негізгі құралдары маусымдық дала жұмыстарын форвардтық қаржыландыру бағдарламасы, тауарлық кредиттер, оның ішінде тұқымдар беру, сондай-ақ ұсақ және орта фермерлерден артық астықты тікелей сатып алу.
Форвардтық сатып алу және тауарлық кредиттер беру аясында 2023-2024 жылдары жеңілдік шарттарымен 129,1 млрд теңгеге 590 агроөндіруші қаржыландырылды. Қызылорда облысының күріш өсірушілерімен алғаш рет 6 мың тонна күріш сатып алуға форвардтық қаржыландыру шарттары жасалды.
Фермерлерге астықтың кепілді өткізілуін қамтамасыз ету мақсатында Азық-түлік келісімшарт корпорациясы соңғы екі жыл ішінде егін шаруашылығы өнімдерін нарықтағыдан жоғары бағамен сатып алуда. Атап айтқанда, 2023 жылы мемлекеттік оператор аграршылардан 27 млрд теңге сомаға 350 мың тонна сыныптан тыс бидай сатып алды. Бұл шара қолайсыз ауа-райына байланысты астық сапасы мен өнімділігінің төмендеуіне байланысты қиын жағдайға тап болған ауыл шаруашылығы өндірушілерін қаржылай қолдауға мүмкіндік берді. Фермерлер алынған қаражатты көктемгі егіске және басқа да өндірістік қажеттіліктерге дайындауға жұмсады.
Өткен жылдың желтоқсан айында мемлекеттік оператор астықты интервенциялық сатып алу бағдарламасы бойынша 3,5 млрд теңге көлемінде бидай жеткізгені үшін агроөнеркәсіп өндірушілеріне алғашқы төлемдерді жүргізді. Бірінші кезекте Азық-түлік келісімшарт корпорациясының резервінен қаражатты тиімділікті сақтау үшін мемлекеттік көмек қажет шағын фермерлік шаруашылықтар алды. Астық операторының бағдарламаларына қатысудың және қаржы бөлудің ашықтығын Өңірлік үйлестіру кеңестері қамтамасыз етеді.
«Азық-түлік келісімшарткорпорациясы» ҰК» АҚ Басқарма төрағасы Асылхан Джувашев атап өткендей, мемлекеттік корпорация фермерлерді қолдай отырып, ауыл шаруашылығы кәсіпорындарының қаржылық тұрақтылығына ықпал етіп қана қоймай, сонымен қатар аграрлық сектордың дамуына жағдай жасайды.
Азық-түлік корпорациясында сақталған астық көлемі 1,7 млн тонна. Қолда бар резерв Қазақстанның азық-түлік және жемдік астыққа деген ішкі қажеттілігін толығымен қамтамасыз ете алады және тұрақты астық көлемін шетелге экспорттауға мүмкіндік береді.
Сурет: Agrotrend.kz
