Ауыл шаруашылығы министрінің міндетін атқарушы Азат Сұлтанов Абай облысының ауыл шаруашылығы тауарын өндірушілерімен кездесті, деп хабарлады министрліктің баспасөз қызметі.
Абай облысының жалпы өңірлік өніміндегі ауыл шаруашылығының үлесі 9 пайызды құрайды, сонымен қатар оның әрі қарай өсу әлеуеті жоғары болып қала береді.
«Президент бізге ауыл шаруашылығының жалпы өнім көлемін екі есеге арттыру міндетін қойып отыр. Бұл үшін заманауи агротехнологияларды кеңінен енгізу, тұқым сапасын арттыру, тыңайтқыштарды пайдалану, техниканы жаңарту және асыл тұқымды мал шаруашылығын дамыту қажет болады. Мемлекет басшысының тапсырмасын тиімді орындау үшін барлық жағдай жасалған. Биыл көктемгі егіс және орақ жұмыстарына жеңілдетілген несиелендіру көлемі 700 млрд теңгеге дейін ұлғайтылғанын білесіздер. Абай облысының 196 шаруасы ерте қаржыландыруды пайдаланды және бүгінде мол өнім алуға үміттеніп отыр», — деп атап өтті Азат Сұлтанов.
Министрдің міндетін атқарушының айтуынша, Мемлекет басшысының ауыл шаруашылығы техникасын жыл сайын 8–10%-ға дейін жаңарту жөніндегі тапсырмасын орындау мақсатында отандық техниканы жеңілдетілген лизингпен беру бағдарламасына жылдық 5% мөлшерлемемен 250 млрд теңге бөлінген. Абай облысының шаруалары 13,5 млрд теңгенің 237 ауыл шаруашылығы техникасын сатып алуға өтінім берген.
Сурет: АШМ
