Абай облысының әкімі Берік Уәлидің төрағалығымен аймақтың әлеуметтік-экономикалық дамуы мен ауыл шаруашылығы санағын өткізуге дайындық барысы талқыланды, деп хабарлады облыс әкімдігінің баспасөз қызметі.
Жиында Ұлттық статистика бюросының Абай облысы бойынша департаментінің басшысы Берік Терлікбаев баяндады.
Елімізде 1 тамыздан 20 қазанға дейінгі аралықта Ұлттық ауыл шаруашылығы санағы өтеді. Санақ екі кезеңнен тұрады: 1-31 тамыз аралығында онлайн, 20 қыркүйектен 20 қазанға дейін офлайн жүргізіледі. Санаққа ауыл шаруашылығымен айналысатын заңды тұлғалар мен олардың бөлімшелері, шаруа мен фермерлік қожалықтар, жеке кәсіпкерлер және жеке қосалқы шаруашылық жүргізетін үй шаруашылықтары қатысады. Санақ объектілеріне жер алқаптары, ауыл шаруашылығы жануарлары мен құстары, техника мен жабдықтар, өндірістік және сақтау нысандары жатады.
1-31 тамызда sanaq.gov.kz сайтында ауыл шаруашылығы субъектілері онлайн сауалнама толтырады. Жүйеге ЭЦҚ, QR-код немесе СМС арқылы кіру қарастырылған. 1-19 қыркүйекте деректер өңделеді. Бұдан кейін интервьюерлер планшетпен офлайн сауалнама жүргізеді. Облыс бойынша 35 учаскеде 148 интервьюер үй аралап, деректерді енгізеді.
Аймақ бойынша 10 703 субъект есепке алынған. Онлайн санақ басталғаннан бері соның 8131-і тіркелген.
Облыс әкімі Берік Уәли төмен көрсеткіш көрсеткен қалалар мен аудан әкімдеріне осы бағыттағы жұмысты жандандыруды, халық арасында ауыл шаруашылығы санағының маңызы туралы ақпараттандыру жұмыстарын жүргізуді тапсырды.
Сурет: облыс әкімдігі
