ҚР Президенті жанындағы Орталық коммуникациялар қызметінде ауыл шаруашылығы өнімдерін қайта өңдеуді дамыту тақырыбында баспасөз конференциясы өтті, деп хабарлады ortcom.kz.
Биылғы 9 айының қорытындысы бойынша азық-түлік өнімдерін өндіру көлемі өткен жылдың осы кезеңімен салыстырғанда 0,8%-ға өсіп, 2,4 трлн теңгеге жеткен. Өңделген ірімшік пен сүзбе – 9,9%, ашытылған сүт өнімдері – 4,4%, сары май – 2,1%, өңделген сүт 0,2%-ға өскен. Өсімдік тектес өнімдер бойынша қант өндірісі – 57%, өсімдік майының өндірісі 8%-ға артты. Бұл жайлы ҚР АШМ Аграрлық азық-түлік нарықтары және ауыл шаруашылығы өнімін қайта өңдеу департаментінің директоры Назгүл Хатепова ОКҚ брифингінде мәлімдеді.
Мемлекет басшысының тапсырмасы аясында бастапқы өндірістен жоғары деңгейде өңделген өнімдер шығаруға көшіп, қайта өңдеу үлесін 70%-ға дейін жеткізу көзделген. Белгіленген мақсатты орындау үшін 2024 жылы маусымда Ауыл шаруашылығы өнімдерін өңдеуді дамыту жөніндегі 2024-2028 жылдарға арналған кешенді жоспар бекітілді. Бұл жоспар салаға қолдау көрсету шараларын қамтиды.
Сурет: АШМ
