Шілде айында Астанада «BaiQymyz – Бапталған қымыз» ұлттық тағамдар гастрофестивалі өтеді. Онда үздік қымыз байқауы ұйымдастырылады. Жалпы жүлде қоры 45 млн теңге. Бұл туралы елорда әкімдігінің ресми сайты хабарлады.
Іс-шараға 50-60 мың адам қатысады деп күтілуде. Фестивальге еліміздің түрлі өңірлерінен 50-ге жуық қымыз өндірушілері келеді.
Әкімдік фестиваль Октоберфестке ұқсас халықаралық деңгейдегі мәдени-аграрлық брендке айналуға арналғанын атап өтті. Екі күн ішінде фестиваль қонақтары Қазақстанда өндірілетін қымыз түрлерінің барлығын сынап көруге, елімізде өсірілетін жылқы тұқымдарының көрмесіне қатысуға, сондай-ақ бай этномәдени мерекелік бағдарламаларды тамашалауға мүмкіндік алады.
Фестивальдің ең негізгі қызығы – «Ең үздік қымыз» атағы үшін жарыс болады. Жүлде қоры – 45 млн теңге: I орын – 20 млн теңге, II орын – 15 млн теңге, III орын – 10 млн теңге.
Шеберлік сабақтарында қатысушыларға қымызды дайындаудың, сақтаудың, ашытудың және капсулалаудың заманауи әдістері көрсетіледі. Сондай-ақ шеберлер тері өңдеу, ат әбзелдері мен тұрмыстық бұйымдарды жасаудағы өнерлерін ортаға салады.
Фестиваль аясында қымыздың емдік қасиеттерін, жылқы шаруашылығы мен дәстүрлі мал шаруашылығын дамыту келешектерін талқылайтын ғылыми конференция өткізу жоспарланған. Конференцияда қазақстандық сарапшылардан басқа Германия, Ресей және Қырғызстан мамандары сөз сөйлейді.
Фестивальдің мақсаты – дәстүрлі тамақтану мәдениетін, оның ішінде қымыз өндіру дәстүрін дамыту.
Сурет: Астана әкімдігі
