Түркістан облысының Арыс қаласында 50 мың бас ірі қара мал бордақылау алаңының құрылысы жүргізілуде. Жоба өңірде мал шаруашылығын жүргізудің австралиялық әдісін енгізу аясында жүзеге асырылуда, деп хабарлады облыс әкімінің баспасөз қызметі.
«Turkestan Agro.kz» ЖШС негізінде Арыста екі ірі жоба іске асырылады. Біріншісі — етті бағыттағы ірі қара мал өсірумен айналысатын репродуктор. Екіншісі — жаңбырлатып суаруды пайдалана отырып, 4710 га алқапта жем-шөп дақылдарын өсіру.
«Салынған нысандар австралиялық «торлы» мал ұстау жүйесі бойынша жұмыс істейтін болады. Жобаны іске асырудың бірінші кезеңінде жыл соңына қарай бордақылау алаңы 15 мың басқа есептелетін болады. 2025-2026 жылдары тағы 10 мың, ал 2026-2027 жылдары 25 мың бас қосылады», – деп хабарлады әкімдіктің баспасөз қызметі.
Жобаның құны 16,2 млрд теңге. Өндірісте 100-ге жуық жаңа жұмыс орны ашылады.
Сурет: облыс әкімдігінен
