Ауыл шаруашылығы министрі Ақмола облысының ауыл шаруашылығы тауар өндірушілерімен кеңес өткізді, деп хабарлайды министрліктің баспасөз қызметі. Онда егін жинау науқанының барысы сараланып, астық сатып алу және фермерлерге мемлекеттік қолдау көрсету мәселелері айтылды. Ақмола облысы Қазақстандағы дәнді дақылдар өндірісі бойынша негізгі бағыттардың бірі. Барлық республикалық бидайдың төрттен бірі осы жерде өсіріледі. Бүгінгі таңда мұнда 4,5 млн. га немесе жоспардың 94,8% жиналды. Шамамен 5,9 млн. тонна астық орылды.
Кеңесте мемлекеттік қолдау шараларының тиімділігі туралы ауыл шаруашылығы құрылымдарының басшылары айтып берді.
Алдыңғы қатарлы агротехнологияларды қолдану арқасында жекелеген егістіктерде 60 ц/га дейін өнімділікке қол жеткізген шаруашылықтардың қатарында — «Максимовское» ЖШС, «Дихан Плюс» және «Журавлевка-1». «Агрофирма Родина» сияқты өңірдің ірі ауыл шаруашылығы өндірушілері егін жинау науқанын аяқтап үлгерді.
Айдарбек Сапаров биыл Үкімет фермерлерді қолдау шараларын қабылдағанын айтты. Көктемгі егін егу мен жиын-терім жұмыстарын жүргізуге алғаш рет 580 млрд теңге, ауыл шаруашылығы техникасының жеңілдетілген лизингіне 120 млрд теңге бөлінгенін атап өтті.
Келесі жылы қаржыландыру көлемін ұлғайту жоспарлануда, бұл саланы жаңғыртуға және өндіріс тиімділігін арттыруға мүмкіндік береді.
Мәселен, көктемгі егін егу мен жиын-терім жұмыстарын қаржыландыру 900 млрд. теңгеге дейін жеткізіледі, оның ішінде ауыл шаруашылығы техникасының лизингі 200 млрд.теңгені құрайды. Жеңілдетілген лизинг алу шарттарын ауыл шаруашылығы өндірушілері үшін барынша қолжетімді және қарапайым ету жоспарлануда.
«Ең бастысы-егін жинауды шығынсыз аяқтау және келесі ауылшаруашылық маусымына уақтылы дайындықты бастау қажет. Үкіметтің қолдауы бар, 2025 жылы біз биылғы жылдың нәтижелерін жақсартуымыз керек», — деп атап өтті министр.
Сурет АШМ сайтынан
