Еліміздің негізгі астықты аймақатырының бірі Ақмола облысында егін жинау науқаны жалғасуда, деп хабарлады облыс әкімдігінің баспасөз қызметі. Өңір фермерлері 4,5 млн гектар егіс алқабын, яғни, 89,7%-ын орып үлгерген. Қазіргі уақытта 5,6 млн. тонна астық жиналыпты.
Облыс әкімі Марат Ахметжанов Бурабай ауданына жұмыс сапары аясында «Burabay Grain» ЖШС-нің егіс алқабын аралап, жұмысшылармен кездесті.
Бурабай ауданындағы егіс алқабы биыл 131,3 мың гектарға жетті. Ауданда өсімдік шаруашылығымен шұғылданатын 357-ден астам ауыл шаруашылығы кәсіпорыны бар.
«30 жылдық еңбек жолымда алғаш рет мұндай жоғары өнімділікті көріп отырмын. Гектарына 52 центнер алып жатырмыз. Маған заманауи техника ұнайды, бәрі автоматтандырылған. Барлық жағдай жасалған», — дейді комбайншы Мырзахмет Аймұрзиев.
Ол күніне шамамен 140 тонна астықты орады. Комбайншының жеке рекорды күніне 236 тоннаға дейін жеткен.
«Burabay Grain» ЖШС 6 мың гектар алқапта арпа, бидай, рапс, зығыр және басқа да дақылдар өсіреді. Егін жинауға 40-қа жуық техникасын жұмылдырған.
Сурет Ақмола облысы әкімдігінің сайтынан
