Мәжіліс депутаты, «Ауыл» фракциясының мүшесі Анас Баққожаев агросаладағы ғалымдардың еңбегі еленбей келе жатқанын айтып, Әділет министрі Ерлан Сәрсембаевқа сұрақ қойды.
«Біздің «Ауыл» партиясының көптеген мүшесі — аграрлық ғалымдар мен фермерлер. Осы ретте бұрыннан шешілмей келе жатқан бір мәселені көтергім келеді. Мал шаруашылығында бірнеше тұқым бар, олардың авторлары көп. Мысалы, «етті меринос» тұқымын 8 адам шығарған, бірақ сол уақыттан бері ешқайсысы бір тиын да алған жоқ — себебі нақты механизм жоқ. Өсімдік шаруашылығында да осындай жағдай: еңбегі еленбей жүрген авторлар баршылық. Бір мысал: бір ғалым өнімді жасап, оның авторы ретінде тіркелген. Бірақ сол өнімді сатқан институт 100 млн теңгеден аса табыс тапқан, ал ғалымға 10 млн теңге тиесілі болса да, бар болғаны 500 мың ғана төлеген. Мұндай әділетсіздікті көрген жастар болашақта ғылымнан кетіп, шетел асып кетпей ме, аграрлық саладағы ғалымдардың жағдайын зерделеп, бұл бағытта ауқымды ревизия жүргізуге дайынсыз ба?», — деп сұрады депутат.
Министр Ерлан Сәрсембаев мұндай мәселені енді ғана естіп отырғанын және алдағы уақытта қарастыратынын айтты.
«Сала шарттық қатынастарға байланысты болады. Бұл мәселені сізден естіп отырмын. Оны зерттеуге, тиісті ұсыныстарың болса ортаға салып шешуге дайынбыз», — деп жауап берді министр.
