Түркияда балық шаруашылығы саласы бойынша екі халықаралық іс-шара өтті, деп хабарлады Ауыл шаруашылығы министрлігінің баспасөз қызметі.
Бірі су биоресурстарын өсіруге арналған 11-ші ғылыми-практикалық семинар және аквакультура бойынша 1-ші халықаралық көрме. Оған Қырғызстан, Тәжікстан, Түрікменстан, Әзірбайжан сынды бірнеше елдерден ғылыми қауымдастықтың, бизнес-құрылымдардың, инвестициялық компаниялардың, мемлекеттік органдар мен үкіметтік емес ұйымдардың өкілдері жиналған.
Қазақстан атынан бұл іс-шараға Ауыл шаруашылығы министрлігі Балық шаруашылығы комитетінің төрағасы Серік Сермағамбетов қатысты. Комитет төрағасы панельдік және пленарлық отырыстарда аквашаруашылық саласының қазіргі жағдайы мен даму перспективаларын айтты. Сондай-ақ, су биоресурстарын өсірудің заманауи технологиялары таныстырылды, сондай-ақ халықаралық кооперация мен инвестициялар тарту мәселелері қаралды.
Халықаралық көрмеде отандық жетекші компаниялардың өнімдері ұсынылды. Атап айтқанда, Шығыс Қазақстан облысындағы «Алтайская форель» ЖШС өз өнімдерін таныстырып, форельді өнеркәсіптік негізде өсіру саласындағы практикалық тәжірибесімен бөлісті.
2017-жылдан бері компания «Гранд Фиш» ЖШС-мен бірлесіп Өскемен су қоймасында форель өсіру жобаларын табысты жүзеге асырып келеді. Қазіргі таңда «Алтайская форель» Қазақстандағы аквашаруашылық саласындағы көшбасшылардың қатарына кіреді.
Сурет: ашық ақпарат көзінен алынды
