Аграрлық сектор саласындағы инвестициялық жобаларды дамытуға биыл Аграрлық несие корпорациясы мен ҚазАгроҚаржы арқылы шамамен 1,5 трлн теңге қаржы бағытталады. Қаржы көктемгі егіс науқаны мен жиын-терім жұмыстарын жүргізуге, инвестициялық жобаларды іске асыруға, негізгі құралдарды сатып алуға және айналым қаражатын толықтыруға, ауыл шаруашылығы техникасының лизингіне беріледі. Бұл туралы Аграрлық несие корпорациясының баспасөз қызметі хабарлады.
Мына бағыттарға басымдық беріледі:
🔵Ауыл шаруашылығы өнімдерін қайта өңдеу және азық-түлік өнімдерін өндіру (әлеуметтік маңызы бар азық-түлік өнімдеріне басымдық беріледі)
🔵 Суару жүйесін дамыту (жаңбырлату қондырғылары, суару жүйесінің құрылыстары, тамшылатып суару)
🔵 Өнеркәсіптік жылыжайлар (көкөніс бағасының маусымдық ауытқуының төмендеуіне ықпал ету)
🔵 Инфрақұрылымды дамыту (орау, сақтау, тасымалдау)
Жем-шөп өндірісін дамыту.
Инвестициялық жобаларды несиелендіру агроөнеркәсіп кешенінің инвестицияларын ұлғайтуға, азық-түлік инфляциясының импортын азайту үшін ішкі өндірісті дамыту және ішкі нарықты отандық өніммен тұрақты қамтамасыз етуге, сондай-ақ экспорттық әлеуетті іске асыру жөніндегі міндеттерді шешуге бағытталмақ.
➤ Жобаларды қамтуды ұлғайту үшін Аграрлық несие корпорациясы арқылы жобаларды несиелендіру лимиттері 7 млрд теңгеден 15 млрд теңгеге дейін артады. Сондай-ақ «Бәйтерек» холдингінің Кепілдік қорының, Дамудың кепілдерін Аграрлық несие корпорациясының ұзақ мерзімді ірі жобаларына қолдану кеңейтіледі, Қазақстанның экспорттық-кредиттік агенттігінің ауыл шаруашылығы өнімдерінің экспортын қолдауға арналған мандаты күшейтіледі.
➤ ҚазАгроҚаржы лизингтік бағдарламалары шеңберінде отандық ауыл шаруашылығы техникасына басым түрде қолдау көрсетіледі. Бұл фермерлерді қолдау шарасы өнеркәсіптік кәсіпорындардың мүмкіндігін кеңейтуге ықпал етеді.
Бұдан бөлек, «Бәйтерек» холдингі құс фабрикаларының пулын қалыптастырып, ауыл шаруашылығы өндірушілерінің экспорттық мүмкіндігін арттыруды жалғастырады. Малайзиямен жаңа өткізу нарықтарын игеру, сондай-ақ астық экспортын $200 млн-ға дейін ұлғайтатын жаңа сауда қорын құру жөнінде келіссөздер жүргізіліп жатыр. Ұзақ мерзімді перспективада аталған көрсеткішті $1 млрд-қа дейін арттыру жоспарлануда.
