Қостанайдағы локализация орталығының базасында «Л-АГРО» технологиясы бойынша вариаторлық үлгідегі сепкіштер өндірісі басталады. Екіжақты келісімге қол қою AgriTek\FarmTek ASTANA 2025 халықаралық ауыл шаруашылығы көрмесінде өтті. Қол қою рәсіміне ауыл шаруашылығы вице-министрі Азат Сұлтанов қатысты, деп хабарлады Ауыл шаруашылығы министрлігінің баспасөз қызметі.
Вице-министр Қазақстанда заманауи әмбебап дән сепкіштерді өндіру туралы келісімге ҚР АШМ бастамасымен отандық ауыл шаруашылығы техникасын өндіруші AGROMASH қол қойғанын атап өтті.
«Министрліктің міндеті – фермерлерді заманауи техникамен қамтамасыз ету. Өздігінен жүретін доңғалақты техника мәселесі толығымен шешілді, бірақ аспалы және тіркеме техникалар бойынша сегмент 100% қамтамасыз етілген жоқ. AGROMASH бұл мәселені шешу мақсатында қысқа мерзімде өндірушімен келісімге келді. Ауыл шаруашылығы тауарын өндірушілерден астық сепкіштердің қандай түрлері мен маркалары талап етілетінін анықтау үшін нарыққа талдау жүргізілді. Биыл Мемлекет басшысының тапсырмасы бойынша жеңілдетілген лизинг көлемі 200 млрд теңгені құрайды, бұл шаруаларды егіс, егін жинау техникасымен, өсімдіктерге күтім жасау құралдарымен қамтамасыз етуге мүмкіндік береді», — деді Азат Сұлтанов.
Жобаның қуаттылығы жылына 2 мың дән сепкіш шығаруға жетеді. Өнеркәсіптік кооперация Қазақстандағы әмбебап үлгідегі дән сепкіштерге нарықтық қажеттілікті жаба алады. Мұндай одақ отандық фермерлерге жоғары сапада, қол жетімді бағада қызмет көрсетеді.
«Agromash және Л-АГРО зауытының инженерлері мен технологтарының қолда бар білімі мен тәжірибесін ескере отырып, біз егіс науқанының оңтайлы мерзімдеріне сәйкес келуге және себу сапасын сақтауға мүмкіндік беретін жоғары сапалы жаңа өнім жасаймыз. Ең бастысы фермерлер бұл өнімді жеңілдетілген лизинг бойынша және 30% субсидиямен ала алады. Біздің филиалдық желіміз Қазақстанның барлық астық егетін өңірлерінде бар, тиісінше фермерлер сервис пен қосалқы бөлшектер үшін уайымдамауына болады», — деді Agromash зауытының коммерциялық директоры Николай Пархоменко.
Осы егіске локализация орталығында бірнеше жүздеген вариаторлық сепкіштер шығару және келесі жылы толық жобалық қуатқа шығу жоспарлануда.
Естеріңізге сала кетейік, 2024 жылы Локализациялық орталық базасында AGROMASH зауыты AMAZONE, CLAAS, KIA және т.б. брендтер үшін компоненттер шығара бастады.
Сурет: Agrotrend.kz
