Аграрлық несие корпорациясының кеңсесінде Астана халықаралық форумы аясында Біріккен Ұлттар Ұйымының Азық-түлік және ауыл шаруашылығы жөніндегі (бұдан әрі FAO) байланыс және әріптестік бюросының өкілдерімен кездесу өтті, деп хабарлады Корпорацияның баспасөз қызметі.
FAO инвестициялық орталығының директоры Мохамед Манссури өз ұйымының қызметі туралы айтты. Ол ұйымның азық-түлік және ауыл шаруашылығы саласында жұмыс істейтініне тоқталды. Бұл инвестициялық орталық – FAO-ның қаржы бөлімі. Орталық техникалық қолдау көрсетеді және Дүниежүзілік банк, Азия даму банкі, Еуропалық Қайта Құру және даму банкі, Африка Даму Банкі және басқалары сияқты халықаралық қаржы ұйымдарымен жұмыс істейді. Сондай-ақ, ұлттық сақтандыру қаржы институттарымен жұмыс істеуге мүдделі.
Сонымен қатар Мохамед Манссури FAO елдерімен ынтымақтастықта жұмыс істеу мүмкіндіктерін айтты. Ол үшін ынтымақтастықтың төрт түрі әзірленген. Біріншісі – қатысушы елдерге мал шаруашылығы, балық шаруашылығы және басқа да шағын секторлар үшін инвестициялық бағдарламаларды әзірлеуге көмектесу. Екіншісі – мемлекеттерге жобалар мен бағдарламаларды әзірлеуге көмектесу. Үшіншісі – негізінен Еуропалық Қайта Құру және даму банкі арқылы жеке инвестицияларды қолдау. Төртінші механизм – жеке қаржыландыру құралдарын жұмылдыру арқылы инновациялық қаржыландыру.
«Аграрлық несие корпорациясы» АҚ Басқарма төрағасының орынбасары Қайрат Сапулатов Корпорацияның құрылымы туралы айтты. Аграрлық несие корпорациясы мен оның еншілес ұйымы ҚазАгроҚаржы аграрлық саланы қаржыландырудағы негізгі компаниялар екенін жеткізді. Өткен жыл Корпорация үшін сәтті жыл болды. Фермерлерді қолдаудың жиынтық көлемі 822 млрд теңгені (1,5 млрд доллар) құрады. Корпорация портфелінде 80 мыңға жуық фермер бар. Жалпы, Аграрлық несие корпорациясы несие беруді, ал ҚазАгроҚаржы – лизингтік бағдарламаларды жүзеге асырады. Несиелер ауыл шаруашылығы тауарын өндірушілеріне тікелей де, қаржыландыру арналары арқылы да беріледі. Атап айтқанда, екінші деңгейлі банктер, микроқаржы ұйымдары, несие серіктестіктері және әлеуметтік-кәсіпкерлік корпорациялар арқылы ұсынылады.
2024-жылдың қорытындысы бойынша 16 мыңнан астам фермерге қолдау көрсетілді. 10,5 мыңнан астам ауыл шаруашылығы техникасы берілді. Бұл қаржыландыру 2023-жылғы көрсеткіштен бір жарым есеге артық. Биыл қаржыландыру жоспары шамамен 1 трлн теңге (2 млрд доллар) болады. Бүгінгі таңда Корпорация фермерлерге 500 млрд теңге беріп үлгерді.
Қайрат Сапулатов ұйымның міндеті – фермерлер қаржы ресурстарына мүмкіндігінше жылдам қол жеткізе алатындай тиімді қаржыландыру жүйесін құру екенін атап өтті.
Сонымен қатар ол FAO өкілдеріне Корпорацияның Кең дала, Агробизнес, Іскер қаржыландыру бағдарламаларының шарттары туралы айтып берді.
Кездесу соңында оқыту, тәжірибе алмасу және жасыл жобаларды тарату саласындағы ынтымақтастықты арттыру туралы шешім қабылданды.
Сурет: Аграрлық несие корпорациясы
