ҚР Президентінің тапсырмасын орындау аясында Үкіметтің қолдауымен «Бәйтерек» Ұлттық басқарушы холдингі және «Аграрлық несие корпорациясы» АҚ мал шаруашылығын дамытуды қолдау үшін қаржыландырудың жаңа бағытын іске қосты, деп хабарлады Корпорацияның баспасөз қызметі.
«Жаңа бағдарлама айналым қаражатын толықтыру үшін ауыл шаруашылығы тауарын өндірушілерді несиелеуге арналған. Бағдарлама аясында ірі және ұсақ мал басын, жем-шөпті, сондай-ақ жанар-жағар майды, мал бордақылау алаңдарына қажет жабдықтар мен техникаға арналған қосалқы бөлшектерді сатып алуға назар аударылады. Бағдарламаның шарттарына сәйкес қарыз сомасының кемінде 70 пайызы мал сатып алуға бағытталуы тиіс«, — делінген Корпорация таратқан ақпаратта.
2025 жылға арналған қаржыландырудың жалпы көлемі шамамен 50 млрд теңге. Бұл бағдарлама бойынша жылдық сыйақы мөлшерлемесі 5 пайыз болады. Қаржы 12 айға дейінгі мерзімге беріледі.
Бағдарламаға қажетті өндірістік инфрақұрылымы бар, негізгі қызмет түрі ірі қара және ұсақ мал бордақылауға бағытталған кәсіпорындар қатыса алады.
Бағдарлама аясында сатып алынатын мал басы жануарларды есепке алудың ақпараттық жүйесінде тіркелген болуы тиіс, сондай-ақ белгіленген жас және салмақ сипаттамаларына сәйкес келуі керек. Несие алушы малдың ауыл шаруашылығы жануарларын сәйкестендіру жүйесіне, селекциялық және асыл тұқымдық жұмыстың ақпараттық базасына келіп түсуі мен кетуін есепке алуды жүргізуге міндетті.
«Аграрлық несие корпорациясы» АҚ мал шаруашылығын тұрақты дамытуға және елдің азық-түлік қауіпсіздігін қамтамасыз етуге бағытталған агроөнеркәсіп секторындағы қаржы құралдарының мүмкіндігін кеңейту жөніндегі жұмыстарды жалғастыруда.
Қосымша ақпаратты www.agrocredit.kz сайтынан немесе 5353 call-орталықтың телефон нөміріне хабарласу арқылы алуға болады.
Сурет: Agrotrend.kz
