Астана қаласының іргесіндегі Нұресіл ауылындағы «Агрофирма «Ақтық» шаруашылығының алаңында 17-18 шілде күндеріне жоспарланған «Jańa Dala / Green Day ‘2025» мамандандырылған көрмесі өтіп жатыр. Бұл іс-шараға 20-дан астам алыс және жақын шетелдерден 200-ден астам компания қатысуда. Сондай-ақ, агроөнеркәсіп кешені мен агробизнес саласының 5 мыңнан астам кәсіби маманы келді.
«Бәйтерек» ҰБХ» АҚ-ның еншлілес компаниялары – Аграрлық несие корпорациясы мен Қазақстан Даму Банкі де көрмеге қатысып, өнімдерін ұсынды.
Мемлекет басшысының 2025-жылғы көктемгі егіс және күзгі жиын-терім жұмыстарын ерте қаржыландыру жөніндегі тапсырмасын іске асыру аясында Аграрлық несие корпорациясы бюджеттік және нарықтық капитал қаражаты есебінен ауыл шаруашылығы тауарын өндірушілерді қолдауға бағытталған «Кең дала» және «Кең дала 2» жеңілдетілген несиелеу бағдарламаларын іске асырып жатыр.
«Аграрлық несие корпорациясы «Кең дала» және «Кең дала 2» бағдарламалары бойынша бүгінгі күнге дейін егін егетін 7 400-ден астам фермерге 490 млрд теңгеге жуық қаржы берді. Қаржыландыруға қолжетімділікті қамтамасыз ету мақсатында «ДАМУ» КДҚ» АҚ тарапынан қарыз сомасының 85 пайызына кепілдік беру бағдарламасын белсенді іске асырылуда. 2025 жылы 188,6 млрд теңгенің 1 277 кепілдігі берілді», — деп атап өтті «Аграрлық несие корпорациясы» АҚ Басқарма төрағасының орынбасары Ерлан Оспанов.
Бағдарлама фермерлердің қаржы ресурстарына барынша жеңілдетілген және ыңғайлы шарттармен қол жеткізуін қамтамасыз етеді. Несие жылдық 5 пайыз сыйақы мөлшерлемесімен беріледі. Фермерлер қаржыны Корпорация филиалдарынан, екінші деңгейлі банктерден, микроқаржы ұйымдарынан, әлеуметтік-кәсіпкерлік корпорациялардан, несие серіктестіктерінен және аймақтық инвестициялық орталықтардан ала алады.
Бағдарлама шарапатын көріп отырған кәсіпкердің бірі – Расул Сейітхамзин. «Кең дала 2» бағдарламасы бойынша несие алған фермер 2021 жылдан бері Аграрлық несие корпорациясымен жұмыс істейді екен.
«Жылдық 5 пайыздық мөлшерлеме біз үшін өте тиімді. Субсидия күтіп уақыт жоғалтпаймыз. Несие тез беріледі. Биыл егін егуге қаржы алдық. Енді күзгі жинау жұмыстарына тағы да несие рәсімдеуді жоспарлап отырмыз», – дейді фермер.
«Бәйтерек» ҰБХ» АҚ-ның еншлілес компаниясының бірі – «Қазақстан Даму Банкі» АҚ өңдеу қуаттарын құруға, тамақ өнеркәсібін жаңғыртуға және экспортқа бағдарланған өндірістерді қалыптастыруға бағытталған ірі инвестициялық жобаларды қаржыландырады.
«Біз қаржыландырған ауқымды жобалардың ішінде Петропавл қаласындағы «Май-дел Петропавл» ЖШС бар. Ол тәулігіне 1200 тоннаға дейін тұқым өңдеп, өсімдік майын, күнжара мен жом шығарады. Өнім ішкі нарыққа да, экспортқа да бағытталған. Тағы бір жобамыз – Абай облысындағы «QAZAQ-ASTYQ GROUP» ЖШС күнбағыс майын ішкі нарыққа және Қытай мен Өзбекстанға экспорттайды. Ақмола облысындағы жылына 90 мың тонна тірі салмақтағы құс етін өндіретін «Макинск құс фабрикасы» ЖШС, жылына 35 мың тонна құс етін өндіретін Алматы облысындағы «Прима Құс» ЖШС, жылына 23,3 мың тонна қызанақ өсіріп шығаратын Түркістан облысындағы «ECOCULTURE-EURASIA» ЖШС сияқты ірі жобалар да бар», — дейді «Қазақстан Даму Банкі» АҚ Басқарушы директоры Қасым Мұханбетов.
Егін егуге немесе күзгі жиын-терім жұмыстарына несие алу үшін кепілдік қою мәселесі туындаса, фермерлерге өте қолайлы жеңілдік қарастырылған.
«Мемлекет басшысының тапсырмасына сәйкес ауыл шаруашылығын қаржылай қолдау көлемін арттыру қажет. Қойылған міндеттерді шешу жолындағы кедергілердің бірі – ауылдық жерлердегі кепіл мүліктің жетіспеушілігі. Біз мұны жақсы түсінеміз, бұл мәселені шешуге фермерлерден үнемі өтініштер келіп түседі. Сондықтан біздің екі еншілес компаниямыз – Аграрлық несие корпорациясы мен «Даму» кәсіпкерлікті қолдау қоры» АҚ арасындағы өзара іс-қимыл тетігі пысықталып, бүгінгі таңда жақсы жұмыс істеп жатыр. Егер қарыз алушы Аграрлық несие корпорациясына келген кезде кепілге қоятын мүлігі болмаса немесе жетпесе «Даму» қорына жүгініп, несие сомасының 85 пайызына кепілдік ала алады», — деді «Бәйтерек» ҰБХ» АҚ Басқарушы директоры Нияз Көшкімбаев.
Естеріңізге сала кетейік, ауыл шаруашылығын қолдауға бағытталған қаржы көлемі жыл сайын артып келеді. Сонымен қатар түрлі жеңілдіктерді қарастырған механизмдер де жүзеге асып жатыр. Бұл еліміздің азық-түлік қауіпсіздігін қамтамасыз ету жолындағы игі істер.
Сурет: «Бәйтерек» холдингі
