Абай облысында шегіртке зиянкестеріне қарсы залалсыздандыру жұмыстары жүргізілуде. Бұл туралы аймақ басшысы Берік Уәлидің төрағалығымен өткен облыс әкімдігінің отырысында айтылды, деп хабарлады әкімдіктің баспасөз қызметі.
Облыстық ауыл шаруашылығы басқармасының мәліметінше, өңірде залалсыздандыру шаралары 19 мамырда басталған. Қазіргі таңда итальялық прус пен азиялық шегірткелердің таралуын азайту мақсатында 9 ауданда химиялық өңдеу жүргізіліп жатыр. Бүгінге дейін 209,57 мың гектар аумақ тексеріліп, 11,37 мың гектар жер залалсыздандырылған. Бұл жұмыстарға 5 жерүсті бүріккіш, 3 аэрозольді генератор, 2 дрон және 1 жеңіл авиация тартылған.
Биыл өңірде шегірткеге қарсы химиялық өңдеу жүргізілетін жердің көлемі 44,8 мың гектарды құрайды. Жалпы, зиянкестердің таралуын болдырмау мақсатында 1563,1 мың гектар аумақ зерттелуде. Алайда күннің ыстық болуы залалсыздандыру жұмыстарын жүргізуді қиындатқан. Отырыста осы іске жұмылдырылатын техника санын арттыруға қатысты ұсыныс айтылды.
Жиын қорытындысында облыс әкімі шегірткеге қарсы шараларды күшейтуді тапсырды. Әсіресе, өңірде ауқымды қоғамдық іс-шаралар өтетін Абай және Ақсуат аудандарын ерекше бақылауды жүктеді.
«Күннің күрт ысуынан шегіртке санының тез өсіп жатқаны байқалады. Сондықтан залалсыздандыру жұмыстарын күшейту қажет. Осыған орай әкімдерге техника санын ұлғайтуға қолдау көрсетуді тапсырамын. Сондай-ақ жаңадан пайда болған зиянкес қоңыздарды залалсыздандыру, жою жұмыстарын жалғастыру керек»,- деді аймақ басшысы.
Сурет: Agrotrend.kz
