Абай облысының әкімі Берік Уәли өңірде ауылды дамытуға бағытталған «Қаладан – ауылға» атты жаңа пилоттық жобаның іске қосылатынын мәлімдеді, деп хабарлады AbaiAqparat. Бастаманың негізгі мақсаты – ауылды түлету, тұрғындардың әл-ауқатын арттыру және қала мен шетелден қоныс аударғысы келетін азаматтарға кешенді қолдау көрсету.
Жоба аясында ауылға көшіп келушілерге баспана алу, кәсіп ашу, мал шаруашылығын дамыту үшін мемлекеттік бағдарламалар арқылы жеңілдетілген несие беріледі. Сонымен қатар шетелден келетін қандастарды қолдау да қарастырылған.
Аймақ басшысының айтуынша, бұл бастаманы ауыл тұрғындары оң қабылдап отыр. Мәселен, Абай ауданындағы Медеу ауылының тұрғындары көшіп келетін отбасыларға қосымша қолдау көрсетуге дайын екенін білдірді.
«Қаладан – ауылға» пилоттық жобасы 20 ақпан күні Семей қаласында өтетін Ауыл әкімдерінің форумында ресми түрде таныстырылады.
