Өңірде көктемгі дала жұмыстарына дайындық жүргізілуде. Биыл ауыл шаруашылығы дақылдарын 753,1 мың гектар жерге егу жоспарланған, бұл 2024-жылмен салыстырғанда 3,6 мың гектарға артық. Бұл туралы Ауыл шаруашылығы министрлігінің баспасөз қызметі хабарлады.
Егіс алқаптарын әртараптандыру жұмыстары жалғасуда. Мәселен, бидай егілетін жер 4 мың гектарға қысқарды.
Тиімділігі жоғары дақылдарға басымдық беріледі. Мәселен, майлы дақылдардың егістік көлемі 12,7 мың гектарға, арпа – 6,3 мың гектарға, қарақұмық 2,3 мың гектарға ұлғаяды. Нәтижесінде майлы дақылдардың егіс алқабы 308,5 мың гектарға жетеді.
Аудандық әкімдіктердің жедел мәліметтері бойынша ауыл шаруашылығы тауарын өндірушілер 39,6 мың тонна тұқым дайындады. Күнбағыс, жүгері және басқа да дақылдардың 6,6 мың тонна элиталық тұқымы мен гибридтерін сатып алуға келісімшарттар жасалды.
Отандық тыңайтқыш өндірушілерін қолдау үшін аванстық субсидиялау тетігі енгізілді. Бұл фермерлер үшін өте тиімді болмақ. Өірде тыңайтқыштарды қолдану деңгейі ғылыми негізделген қажеттіліктің 39%-на дейін өсті. Биыл 63,6 мың тонна тыңайтқыш пайдалану жоспарланған. Тыңайтқыш өндірушілермен және жеткізушілермен келісімшарт жасасу жұмыстары жүріп жатыр.
Көктемгі дала жұмыстарын жүргізу үшін 27,5 мың тонна дизель отыны бөлінді.
Қазіргі уақытта ауыл шаруашылығы техникалары 90%-ға дайын. Егін егу жұмыстары басталғанға дейін толық дайын болады. Фермерлердің иелігінде 7 800-ден астам трактор, 300 жоғары өнімді егін егу кешені, 1 900 сепкіш және 2 800-ге жуық топырақ өңдеу агрегаты бар.
Өткен жылы мемлекеттік қолдау шараларының арқасында фермерлер 513 заманауи ауыл шаруашылығы техникасын сатып алды. Бұл машиналар мен тракторлар паркін 5,9%-ға жаңартуға, сондай-ақ көктемгі егін егу мен күзгі орақ науқаны кезінде еңбек өнімділігін едәуір арттыруға мүмкіндік берді.
«Кең дала» бағдарламасы аясында көктемгі егін егу мен күзгі жиын-терім жұмыстарына жылдық сыйақы мөлшерлемесі 5% болатын жеңілдетілген несие беру қарастырылған. Биыл ауыл шаруашылығын қаржыландыру көлемін арттыру мақсатында жергілікті фермерлер жалпы сомасы 8,1 млрд теңге болатын 157 өтінім берді.
Сурет: Agrotrend.kz
