Бүгін Абай облысында агроөнеркәсіп кешені саласындағы маңызды жоба іске қосылды, деп хабарлайды Agrotrend.kz. Cемей қаласында ашылған кәсіпорын бұршақты және майлы дақылдарды терең өңдеуге арналған. Жоба «AgroLeader KAZ» ЖШС базасында ашылып отыр. Жалпы құны 4,1 млрд теңге болатын зауыт заманауи технологиялармен жабдықталған және қуаты жылына 72 мың тонна шикізатты қайта өңдеуге жетеді. Зауытта 50 жаңа жұмыс орны ашылды.
Агрокәсіпорынның ашылу салтанатына Абай облысының әкімі Берік Уәли мен ҚР Сыртқы істер министрінің орынбасары Әлібек Қуантыров қатысып, жаңа өндіріс нысанының жұмысына сәттілік тіледі.
«Мемлекет басшысы аграрлық саланы әртараптандыру, шикізатты терең өңдеу және қосылған құны жоғары өнім өндіру міндетін айқындап берген болатын. Бүгін іске қосылып отырған кәсіпорын – сол тапсырмалардың өңірлік деңгейде жүзеге асуының айқын көрінісі. Мұндай жобалар облысымыздың инвестициялық тартымдылығын арттыруда және жаңа технологияларды, заманауи стандарттарды енгізуде үлгі болары сөзсіз. Ерекше атап өтерлігі, мұндай кәсіпорын елімізде жоқ. Ең бастысы, біз енді тек шикізат өндіруші емес, сапалы дайын өнім шығаратын өңдеуші аймақ ретінде дамуға қадам басып отырмыз. Бұл ауыл шаруашылығы тауарын өндірушілердің табысын арттыруға, экспорттық әлеуетті кеңейтуге және инвестициялық тартымдылықты күшейтуге ықпал етеді», – деді облыс әкімі.
Сыртқы істер министрінің орынбасары Әлібек Қуантыров құттықтау сөзінде жаңа зауыттың ел экономикасы үшін маңызды екенін айтты. «AgroLeader KAZ» ЖШС құрылтайшысы Әсемқан Досқожанов зауыт құрылысы қысқа мерзімде салынғанын атап өтті.
«Бұл өндіріс орыны бір жарым жылда салынды. Жан жақты қолдау білдіргені үшін облыс әкімдігіне алғыс айтамыз. Өнімдер 10 мемлекетке экспортталып, жаңа зауыт ел экономикасының дамуына өзіндік үлесін қосатын болады деп сенеміз», — деді ол.
2023 жылы құрылған «Agrolider KAZ» кәсіпорны жарма, ұн және өзге де тамақ өнімдерін өндіруге маманданған. Мұнда жасымықтың бірнеше түрі, зығыр, асбұршақ, жүгері, қарақұмық және басқа да ауыл шаруашылығы өнімдері өңделеді. Кәсіпорынның жылдық дайын өнім өндіру қуаты 800 тоннаны құрайды. Өнімдер Еуропа елдеріне, Қытайға, Түркияға және Африка мемлекеттеріне экспортталады.
Облыс әкімдігі баспасөз қызметінің хабарлауынша, аймақта былтыр агроөнеркәсіп кешенін дамыту Жол картасы аясында 16,3 млрд теңгеге 11 ірі агрожоба іске асырылды. Биыл қайта өңдеу саласында 7,3 млрд теңгеге «QAZAQ-ASTYQ GROUP» ЖШС базасында тазартылған май өндірісін және 7,7 млрд теңгеге «Eurasia Agro Semey» ЖШС базасында ірі ет өңдеу зауытын іске қосу жоспарланып отыр.
Сурет: облыс әкімдігі
