Абай облысының әкімі Берік Уәли өңірдің алдағы жылдардағы даму жоспары туралы баяндамасында ауыл шаруашылығы саласындағы жобаларға тоқталды, деп хабарлады аймақ әкімдігінің баспасөз қызметі.
Биыл облыста ауыл шаруашылығы өнімінің жалпы көлемі 486 миллиард теңгеге жетіп, өсім 103 пайызды құраған. Ірі қара мал саны 743 мың басқа жетіп, республика бойынша 3-орында тұр екен.
Өңірде ауыл шаруашылығын дамытудың 2028-жылға дейінгі моделі әзірленді. Ол ет кластерін құру, тауарлы сүт фермаларын салу, етті құс шаруашылығын дамыту және суармалы егіншіліктің әлеуеті сияқты бағыттарды қамтиды. Бұл бағытта ірі инвестициялық жобаларды қаржыландыру бағдарламасы аясында 13 миллиард теңгеге ет комбинаты, бордақылау алаңдары, тауарлы сүт фермалары, су үнемдеу технологиялары, қой шаруашылығы, тауарлы балық өсіру жобалары іске асырылуда. Аталған бастамаларды қолдау үшін жыл соңына дейін қосымша 8 млрд теңге бөлінеді деген жоспар бар.
Ет кластерін дамыту аясында Жаңасемей ауданы Шақаман ауылында «ЕвразияАгроСемей» ЖШС тәулігіне 35 тонна ет өңдейтін кешеннің құрылысы басталды. Мұнда жылына 12,6 мың тонна ет өнімдері өндірілетін болады, 7 мың бас қойға арналған бордақылау алаңы дайындалуда.
«Бұл кәсіпорындар жаңа жұмыс орындарын ашып, өңірдің азық-түлікпен қамтылуына үлес қосады. Осы бағытта жұмысты жалғастырып, әкімдік тарапынан тиісті қолдау көрсетуге дайынбыз», — деді облыс әкімі.
