ҚР Парламенті Мәжілісінің депутаты Айдарбек Қожаназаров астық нарығындағы бүгінгі ахуалға алаңдаулы. Фермерлердің мүддесін қорғау үшін нақты шешімнің қажеттігі туралы Үкіметке ұсыныс дайындап жатқанын хабарлады, іnstagram әлеуметтік желісіндегі парақшасында.
«Еліміздің бидай нарығындағы жағдайы қиын. Биылғы өнімнің молдығына қарамастан, бағаның құлауы, қоймалардың толуы мен астықты сақтау қиындықтары фермерлердің еңбегін толығымен жүзеге асыруға мүмкіндік бермей отыр. Мұның бәрі кредиттердің уақытылы төленуін қиындатқан. Техникадан бастап дәнді-дақылға дейін қарызға алып, енді үлкен тығырыққа тірелген шаруалардың жанайқайын мен де шаруа адамы ретінде жақсы түсінемін. Сондықтан да Үкімет алдында сіздердің мүдделеріңізді қорғап, бірқатар нақты шешімдерді дайындап жатырмын», деп жазды депутат.
Фермерлерді тығырықтан шығаратын нақты шешімдерді де жариялады. Егер осы ұсыныс қолдау тапса егін егумен айналысатын ауыл шаруашылығы тауарын өндірушілерге көп жеңілдік болатынын айтты.
«Атап айтсам:
«Кең дала» бағдарламасы бойынша бидайын сата алмай отырған шаруалар үшін кредиттер бойынша жеңілдік мерзімін ұзарту керек. Қарыздан құтылуға көмектесу үшін жоқ дегенде 3-5 айға дейін жеңілдік мерзімін қарастыру керек;
Нарықтағы артық бидайды сатып алу үшін продкорпорацияға қосымша қаражат бөліп, экспортқа шығару жұмысын қолға алу керек;
Тасымалдау шығындары бойынша субсидиялау ережелерін тездетіп бекіту де өзекті. Бұл фермерлерге өнімді әлдеқайда тиімді сатуға және тасымалдау шығынын азайтуға көмектеседі», — дейді А. Қожаназаров.
Сурет: іnstagram
