Ауылдық аумақтарды білікті кадрлармен қамтамасыз етуде шешуші рөл атқаратын «Дипломмен ауылға» бағдарламасы 2025-2027-жылдары жалғасады, деп хабарлады Ұлттық экономика министрлігінің баспасөз қызметі.
«AMANAT» партиясының 2003-2007-жылдарға арналған «Халықпен бірге» сайлауалды бағдарламасының Жол картасын орындау аясында ауылдық жерге жіберілетін мамандарға бюджеттік кредит беруге 2025-жылы 25 млрд теңге қарастырылған. Бұл шамамен 2,8 мың маманды тұрғын үймен қамтамасыз етуге мүмкіндік береді.
«Дипломмен ауылға» мемлекеттік жобасы 2009-жылдан бері іске асырылуда. Ол ауылдағы кадр тапшылығы проблемасын шешуге арналған. Негізгі мақсат – денсаулық сақтау, білім беру, әлеуметтік қорғау, мәдениет, спорт, агроөнеркәсіп кешені саласына, сондай-ақ жергілікті жерлердегі мемлекеттік басқару органдарына дипломы бар мамандарды тарту.
Жобаға қатысушыларға мынадай әлеуметтік қолдау шарасы ұсынылады:
* 100 АЕК мөлшерінде біржолғы көтерме жәрдемақы;
* тұрғын үй сатып алуға немесе салуға аудан орталығында 2 500 АЕК, ауылдық елді мекенде 2 000 АЕК бюджеттік кредит бөлінеді.
Кредит 15 жылға беріледі. Міндетті шарт — ауылдық жерде кемінде үш жыл жұмыс істеуі тиіс.
2023-жылдың 1-сәуірінен бері жобаны іске асыру жөніндегі агент «Отбасы банк» АҚ. Цифрландыру мақсатында өтінім беру мен кредит алудың барлық процесі Baspana Market — otbasybank.kz/programm-bank платформасында толықтай автоматтандырылған.
Біржолғы көтерме жәрдемақы алушылардың құрылымы:
* Білім беру саласындағы мамандар – 78 мың маман (68,3%);
* Денсаулық сақтау қызметкерлері – 24,4 мың маман (21,4%);
* Мәдениет, спорт және әлеуметтік қорғау қызметкерлері – 6,9 мың маман (6%);
* Ауыл шаруашылығы мамандары – 4 мың маман (3,5%);
* Ауылдық округ әкімі аппаратындағы мемлекеттік қызметшілер – 900-ге жуық маман (0,8%).
Тұрғын үй кредитін алушылардың құрылымы:
* Білім беру саласындағы мамандар – 35,1 мың маман (67,1%);
* Денсаулық сақтау мамандары – 11,6 мың маман (22,2%);
* Мәдениет, спорт және әлеуметтік қорғау қызметкерлері – 3,4 мың маман (6,4%);
* Ауыл шаруашылығы мамандары – 1,9 мың маман (3,6%);
* Ауылдық округ әкімі аппаратындағы мемлекеттік қызметшілер – 360-тан астам маман (0,7%).
Сурет: Ұлттық экономика министрлігі
