Түркістан облысының Ордабасы ауданына қарасты Бөген ауылында ауыл шаруашылығы саласының дамуына сүбелі үлес қосып келе жатқан «Орда-басы Agro» шаруа қожалығы бар деп хабарлады аудан әкімдігінің баспасөз қызметі. 2017 жылы құрылған қожалықтың негізін жергілікті азамат, еңбекқор кәсіпкер Әбілда Әлібеков қалаған. Қазіргі таңда оның туған інісі Ерғали Әлібеков шаруашылықтың басқару тізгінін ұстап, ағасының бастаған ісін абыроймен жалғастырып келеді.
Шаруашылықтың негізгі бағыты — егін шаруашылығы. Қазіргі таңда қожалық иелігінде 900 гектар ауыл шаруашылығы алқаптары бар. Оның 350 гектарына мақта, 250 гектарына жүгері, 300 гектарына жоңышқа дақылдарын егеді. Әрбір дақылдың агротехникалық күтімі мен өнімділігіне ерекше мән беріліп, заманауи технологиялар мен техника пайдаланылуда.
Айта кетерлігі, “Орда-басы Agro” тек егін егу және жинаумен ғана шектелмейді. Қожалық сонымен қатар өзге де шаруа иелері үшін агротехникалық қызметтер көрсетумен айналысады. Бұл — жер жырту, тырмалау, тұқым себу, суғару, өнімді жинау сияқты барлық кезеңдерді қамтитын кешенді қызмет. Қожалықтың техникалық базасы толық жасақталған: заманауи тракторлар, комбайндар, сеялкалар мен басқа да қажетті жабдықтар алқап басындағы жұмыстың сапалы әрі уақтылы орындалуына мүмкіндік береді.
Бүгінде шаруашылықта 20-ға жуық ауыл тұрғынын тұрақты жұмыспен қамтып отыр. Бұл – жергілікті халықтың әлеуметтік жағдайын жақсартуға жасалып отырған нақты қолдау.
Шаруашылық басшысы Ерғали Әлібековтің айтуынша, өнімділік жыл сайын артып келеді. Бұған жердің құнарын сақтау, агрономиялық кеңестерге құлақ асу, еңбеккерлердің тәжірибесі және заманауи техниканы тиімді пайдалану арқылы тікелей жүзеге асып отыр.
“Орда-басы Agro” — ауыл экономикасын көтеруге, жергілікті халықты жұмыспен қамтуға және азық-түлік қауіпсіздігін қамтамасыз етуге өз үлесін қосып отырған іргелі шаруашылық. Алдағы уақытта қожалық өз жұмыс ауқымын кеңейтіп, жаңа технологияларды енгізу арқылы аграрлық саладағы жетістіктерін еселей түспек.
