Қазақстанда 2024-жылы мақсаты бойынша пайдаланылмаған немесе заң бұзушылықпен берілген 2 млн гектардан астам ауыл шаруашылығы мақсатындағы жерлер мемлекеттік меншікке қайтарылды. Биыл Ауыл шаруашылығы министрлігі тағы 2 млн гектар жерді қайтарып алуды жоспарлап отыр, деп хабарлады АШМ Жер ресурстарын басқару комитетінің төрағасы Мұрат Теміржанов.
«2025-жылы біз 2 млн га пайдаланылмаған ауыл шаруашылығы жерін мемлекет меншігіне қайтаруды жоспарлап отырмыз. Бұл жер ресурстарын ұтымды пайдалану және оларды шаруашылық айналымға тарту үшін негіз болады», — деп жазды Мұрат Теміржанов әлеуметтік желіде.
Оның айтуынша, биыл Қазақстанда көміртегі егіншілікті дамыту бойынша жол картасы әзірленіп, бекітіледі. Бұл климаттың өзгеруіне қарсы күресте және топырақ құнарлылығын арттыруда маңызды қадам болады.
Сонымен қатар, 2024-жылы 2024-2030 жылдарға арналған топырақ құнарлылығын қалпына келтіру және арттыру жөніндегі жол картасы бекітілді. Оны іске асыру шеңберінде 2025-жылы жердің тозуына қарсы күреске баса назар аудара отырып, өңірлік жоспарларды бекітуге ерекше көңіл бөлінетін болады.
Сондай-ақ Парламентте «Топырақты қорғау туралы» заң жобасын қарау жалғасады. Бұл топырақты қорғау, оның сапасы мен құнарлы қабатын сақтау мәселелерін реттеудегі негізгі құжат болады.
«Осы бағыттардың әрқайсысы біздің әріптестеріміздің кәсібилігін, жергілікті атқарушы органдармен белсенді өзара іс-қимылды және азаматтық қоғамның қатысуын талап етеді. Бірлескен күш-жігермен алға қойылған мақсаттарға қол жеткізетінімізге сенімдімін», — деп атап өтті Мұрат Теміржанов.
Сурет: agrotrend.kz
